vaishnav jan lyrics in gujarati (વૈષ્ણવજન)

                        વૈષ્ણવજન


વૈષ્ણવજન તો તેને કહીએ,   જે પીડ પરાઈ જાણે રે;
પર દુ:ખે ઉપકાર કરે તોયે,  મન અભિમાન ન આણે રે. ॥

સકળ લોકમાં સહુને વંદે,   નિંદા ન કરે કેની રે,
વાચ, કાછ, મન નિર્મળ રાખે,   ધન ધન જનની તેની રે. ॥

સમદૃષ્ટિ ને તૃષ્ણા ત્યાગી,   પર સ્ત્રી જેને માત રે,
જિહ્વા થકી અસત્ય ન બોલે,  પરધન નવ ઝાલે હાથ રે. ॥

મોહ માયા વ્યાપે નહિ તેને,   દૃઢ વૈરાગ્ય જેના મનમાં રે,
રામનામ શુ તાળી રે લાગી,   સકળ તીરથ તેના તનમાં રે. ॥

વણલોભી ને કપટરહિત છે,   કામ - ક્રોધ નિવાર્યાં રે,
ભણે નરસૈયો તેનું દર્શન કરતાં,   કુળ ઈકોતેર તાર્યાં રે. ॥